آخر الأخبار

جاري التحميل ...

انتي بايرة ؟


في البداية احنا عارفين اننا عايشين ف مجتمع ذكوري ...لا والكارثة كمان شويه عادات وتقاليد زي الفل اموت واعرف لسه ماشيين بيها ازاي لحد دلوقتي؟؟؟المشكلة ان العادات والتقاليد دي احنا اللي بنحطها وكمان 5سنين ممكن نحط غيرها ونعدل فيها ...ف ليه بقي بنتعامل بيها علي انها قرأن وبننسي نتعامل بالدين والقران اصلا ..
بس الكارثةالكبيرة والتقيلة بقي اننا بنحمل البنت كل بلاوي الدنيا 
مثلا البنت نزلت من بيتها واتعاكست ..نقوم احنا هووب بدل مانجيبلها حقها نقوم ايه بقي؟ نقولها مانتي هدومك مش حشمة ..اقسم بالله البنات بتبقي نازلة بأسدال وبتتعاكس ..ده اللي هوا ازاي ؟ انت بتسيب الحمار وتتشطر ع البردعة ؟؟ ..سيبك من الهدوم 
بنت تانيه نزلت قام واحد اتحرش بيها مع انها لابسه كويس نقوم ايه بقي نلزق ف المكياج ..مانتي مكياجك اوفر وماينفعش ،،،تستاهلي ،،انتي مش محترمة ..وجايز تلاقيها ف الاخر حاطة كحل ونازلة 
بنت تالتة خالص ركبت مواصلات وحد حاول يلمسها ..وهيا اثبتت انه حاول يلمسها وهيا بتفضحه تلاقي حد يقولها تلاقيكي ماكنتيش قاعدة عدل او واقفة عدل ...انت اهبل يابني ؟ عندك مخ اصلا؟ المصيبه المنيله انك تلاقي اصلا واحدة ست تقوم قايله يابنتي سيبيه هاتضيعي مستقبله ..وهنا بقي المصيبه م العيار التقيل ..هوا انتي معايا ولا مع مين بالظبط 
المهم احنا كدة وصلنا ف الاخر ان البنت هيا السبب ف اي حاجة منيله ومهببه بتحصلها وهاتحصلها ..
ماتوئدونا احسن الله يكرمكوا 
نيجي بقي للبلاوي الاكبر ..بنت غلطت مثلا ...دي بقي بنت ضيعت نفسها وغلطانة وسافلة ولازم تموت ...بس الحق يقال هيا لازم تتعاقب لوحدها ...ده علي اساس انها غلطت مع نفسها او لوحدها مافيش طرف تاني ؟لا هيا مااتربتش وسافلة ولازم تموت جابتلنا العار "بالمناسبة انا ضد الغلط نفسه سواء كان من راجل او بنت ..الغلط غلط واللي غلط يتحاسب ويتحمل النتيجة ..لكن مايبقاش خيار وفقوس" .
علي فكرة الدين نفسه حكم علي الزاني والزانيه نفس الحكم الدين اصلا مافرقش بس الراجل والست غير ف الميراث ...اه بالمناسبة الدين نفسه أمر الراجل بغض البصر زي ماأمر البنات كمان ..مش قولتلكم احنا عندنا خيار وفقوس ؟ 
سيبكو بقي من ده كله واحدة اتاخرت ف الجواز ...نقوم احنا نحس بمصيبه ..يالهوي البت كبرت ..يادي النيله البت بايرة ...ده ع اساس ايه والنبي ...البنت لما تتاخر ف الجواز تبقي بايرة وعانس ..لكن الراجل لما يتاخر يبقي كان الله ف عونه هايعمل ايه ولا ايه ..يقطع نفسه؟..عين قلب امه متمرمط وطالع عينه ...ونحطها ف مواقف زي الزفت عشان اتاخرت ف الجواز ...كفايه عليها والنبي كلام طنط وهيا بتقولها نفسي افرح بيكي ...طب ماتفرحي هوا انا وحشة ؟ ..تيجي طنط التانيه تقولها شدي حيلك ..اموت واعرف الحيل ده شكله ايه وبيتشد ازاي وانا والله ماهاقصر وهافضل اشده لحد ما يتقطع او يطلعلي بعريس ..اديني فرصتي وانا اطلع بعريس ..حاضر 
ده حتي ف الامثال بنقول"وراء كل رجل عظيم امراة ..ده اللي هوا ايه ..ليه وراه مش معاه ولا جنبه ..مخها ناقص مسمار مثلا ...مفوت ؟ .
النتيجة يعني ان البنات والستات كائنات هياالسبب ف المعاكسات والتحرش والاغتصاب اللي بيحصلها .
كان الله ف عوننا ..واتمسوا بالخير 


التعليقات



إذا أعجبك محتوى مدونتنا نتمنى البقاء على تواصل دائم ، فقط قم بإدخال بريدك الإلكتروني للإشتراك في بريد المدونة السريع ليصلك جديد المدونة أولاً بأول ، كما يمكنك إرسال رساله بالضغط على الزر المجاور ...

إتصل بنا

زوار المدونة

احصاءات المدونة

جميع الحقوق محفوظة

دكتورة ....بما لا يخالف شرع الله

2016